انت ما مجبور علينا ونحن ما مجبورين عليك..
حاج سيداحمد رجل مواقف وزول نصيحة ما بعرف يلف ولا يدور.. لو زعل منك يرميها ليك طاااخ.. وفي لسانو دائما “ياخي انت ما مجبور علينا ونحنا ما مجبورين عليك امشي شوف الشغلة البي تنفع معاك”
المرة ختاها عدييل لي وزير الثروة الحيوانية والسمكية عشان قال عايز وظيفة إضافية تساعدوا في مصاريف البيت لانو مرتب الحكومة ما بكفيهو… كلام عجيب والله… مش عجيب وبس كمان مثير ولأول مرة يحصل.
ايها الوزير والله لو شفت ولاة الولايات والوزراء بحاوروا مخصصات التسيير الشهرية كيف تقول داا حاوي ما بقدر عليها…
طيب نقوليك من الآخر كداا.. دا وطن اسمو السودان كان ما عارف اعرف.. وأهلو عايشين على بصلة وموية والحمد لله.. كان ما قادر على المهمة دي عشان الوطن نقول ليك حواء والدة زيك في ملايين من الخبراء والعلماء المتعلمين الما بفكروا في القروش.
قاعدين شغالين مستورين.
يا خيبتي عليك.. يا حسرتي عليك.. وعلى الوطن الرماك علينا.
.. عايز وظيفة إضافية كما تحدد الدول العايز تشتغل فيها عديييل كدااا… والله كان أحسن ليك لو بعت موية في السوق ولا اشتغلت درداقة، نقول والله يا سلاااام وزير شغال بي ضراعو في سوق الله أكبر بعد الدوام،
ياخي مش أحسن كان تقدم استقالتك بدل السويتو داا.. وبعداك تطلب الوظيفة لكن عايز تركب سرجين “ركيب سرجين وقيع”
قال عايز وظيفة إضافية…. عشان المرتب ما بكفي المصاريف… والله يا حكومة الأمل عملتوها في الزول داا.. جيتوهو فزعة بقى ليكم وجعة.. أحسن تقول ليهو شكرااا جزيلا كفيت ووفيت.
ما قلنا ليكم ما تعينوا زول من برااا البلد (مغترب أو حامل جنسية) وزير ولا خفير عشان ما يوجع قلبنا.. ويعمل ضغط وسكري.. اها جاتكم عدييل بالباب الأمامي امسكوا الخشب بس، وانا بقول ليكم بصراحة أحسن الزول دااا يمشي لانو ما يفيد البلد في حاجة قلبو ما على الوطن قلبو على القروش، وحا يخم نفسنا معاهو كمان وما يفيدنا في حاجة والله. .. لو ما عارف حقو يعرف في وزراء اتبرعوا مرتباتهم وقالوا عايزين نشتغل مجاني كداا.. وفي الما عندو حق مصاريف اليوم..
(شكرا وزير الثقافة والإعلام أ. الأعيسر… شكرا والي ولاية الجزيرة ووزراء حكومتو).. نحن عارفين انتو كيفن مدورين الولاية بطريقة “الحاوي”
(خمة نفس)
شعب واحد، جيش واحد.. ما ينومواا
