لم يكن حاج سيد أحمد يعلم أن السودان هو الدولة الثانية في العالم بعد دولة إثيوبيا من حيث تربية الحمير، فكان دائماً في حالة من الهياج والصراخ مع الدحيش ولد “الحمار”، غير أن حاج أحمد “أبو العريف” عرف كيف يقدم له النصيحة والمعرفة أن الحمير ثروة اقتصادية لا يمكن التفريط فيها ويجب الاستفادة منها اقتصادياً.

@ ليقول حاج سيد أحمد وهو متكئ على وسادته: “كيفن يعني أنو الحمير ديل ثروة اقتصادية يا حاج حمد؟ كل يوم جايب لينا موضوع جديد، كدي اقعد لي في الواطة دي وقول لينا كلامك دااا عدييل ما أصلك زول محن.”

حاضر يا حاج سيد أحمد، أصلاً أنت عارف الحمار عندنا بنشغله شنو: في السفر، الكارو، وقلايب الرملة من البحر، ماهو صبور وبال طويل. والزول لمن يقولوا ليهو “انت حمار” ما نبذوه، لكن عندنا في السودان نبذوه ومسحوا بيهو الواطة كمان. والحمار عندنا شايل الشيلة في كل الزمن، لكن نحن ما مهتمين بيهو.

@ خلينا من الفلفسة بتاعتك دي، شوف يا أبو العريف ورينا حماري دا بيجيب كم دولار، وبسعر اليوم كمان.

طيب، أقوليك يا حاج سيد أحمد، حمارك دااا من الآخر بيجيب كم، وأحسن أورّيك أول حاجة أسعار الحمير في العالم كمان.. وهاك دي يا حاج: الصين بستورد الحمير من أفريقيا، سعر الحمار يختلف من دولة لدولة حسب الطلب والجودة، وجلد الحمار في الصين يا حاج يصل سعره إلى (1000) دولار أمريكي، لأنه يطلع منه دواء تقليدي يقولوا ليهو “إيجياو”. وفي أفريقيا سعر الحمار بين (120-145) دولار أمريكي، والحمار المصري (3000) جنيه مصري، وهو معروف الأفضل على مستوى العالم.

@ حاج سيد أحمد، وتأني البلاد القاعدة تشتري الحمير من ياتو بلد؟

طبعا الصين، وهي مستوردة لجلود الحمير، وهي عشان تطلع منه الدواء للعلاج. ودا يا حاج سيد أحمد دواء تقليدي صيني من جلد الحمار، ومن الأدوية المرموقة والمعروفة في الطب الصيني التقليدي “البلدي”، يعالج ويقوي النقص في الدم ويحسن الصحة كمان ويوقف النزيف والجفاف والكحة.

@ حاج سيد أحمد، بعد عدل من جلسته: “جلد حميرنا ديل كيف يا حاج حمد؟”

جلود حميرنا من أفضل أنواع الجلود في العالم، لكن نحن ما شايفين العالم عايز شنو، وكمان لبن الحمارة (حليب الحمير) له فوائد طبية علاجية، وله في الصناعة الدوائية مكانة، لأنه مليان بروتينات وفيتامينات ومعادن مثل الكالسيوم والفوسفور، ويعالج النزلات البردية والإنفلونزا والجروح كمان.

@ يا حاج حمد، بقيت دكتور بيطري عدييل وخبير اقتصادي كمان. إسع يعني كداا بكون عندنا ثروة كبيرة في السودان من قبل الحمير.

حاج حمد: عندنا يا حاج “والله يكرم السامعين” (7.5) مليون رأس تقريباً. ممكن نستفيد منها اقتصادياً للتصدير، لكن لازم تكون مطبوخة لحم وجلد، عشان الجماعة ما يربوها هناك، وأنت عارف الصينيين شديدين في الحاجات. ممكن يطلعوا ليك من الحمار حمارين وزيادة دحيش كمان، وبعد داك يقولوا لينا “شكرا اكتفينا من الحمير.”

@ حاج سيد أحمد: “كلامك سمح يا أبو العريف، لكن نحنا نعمل شنو؟”

نعمل أي حاجة تنفع اقتصادنا يا حاج سيد أحمد. أول حاجة نحافظ على جودة الحمير، ووزارة الثروة الحيوانية والسمكية تضع الموضوع من ضمن الخطط الاستراتيجية الاقتصادية لزيادة أعداد الحمير في السودان، بإقامة مزارع وحظائر بيطرية كبيرة ومسالخ للصادر، وفتح أبواب الاستثمار في الموضوع داا وفق شروط صحية واضحة، لأنه دااا مهم جداً. بس ما نقوم نصدر الحمير ماشية على كرعينا، وبعدين نسمع كلام تاني. ويكونك أبزيد لا غزا ولا شاف الغزوا، يعني اديناهم ببلاش وخلاص نربع يدينا ونقعد نفرج. وكلامي داا الناس ممكن يكون شايفنه كلام هبوب، لكن دا ياهو الكلام الصاح، لازم ندخل العالم وحميرنا في يدنا، ما فيش تفريط. حول الموضوع، رأيكم فيه شنو يا حاج سيد أحمد؟

@ كلامك صاح يا حاج حمد، وحميرنا ثروة اقتصادية لن نتركها تضيع أبداً. عاشت الحمير لتكون ثروة اقتصادية للوطن.. عاشت الحمير.. عاشت الحمير.

(خمة نفس)
عندما ينزلق القلم عمداً وقصداً لأجل الكسب الابتزازي الملون، تارة أبيض ومرة أحمر ثم أسود، من دون دراية ومعرفة ببواطن الأمور وما تم وكيف تم ذلك العمل، وما سيتم مستقبلاً، ينكسر القلم في وقته مطأطأ رأسه خجولاً متوارياً من خلف ستار ممزق بعدما عرف الحقيقة.. فلكم في ذلك درس، لو كنتم لا تعلمون.

(خمة نفس)
شعب واحد… جيش واحد.. “ما ينوموا”.