نقطة.. نقطة

نقطة (1)
الوقت يمضي ونحن ما زلنا نتهم فلان وعلان من دون إثبات ودليل قاطع، الوطن في حاجة للجميع والجميع سواسية في الواجبات وتحت القانون ولسنا من فوق القانون.

نقطة (2)
الوساطة والمحسوبية تتفشى وتمشي على رجليها ولا أحد يحاسب أحد، كلنا مخطئون ولصوص حرامية.

نقطة (3)
تقاطع المستشفى العمومية صيدلية الخير وميس الأطباء، طبالي ودقاقات بائعات الفول والتسالي إعاقة حركة السير والمرور، أين أنتم يا رجال المرور وإدارة تنظيم الأسواق.

نقطة (4)
حتى لا نفقد تلميذا ونتحسر عليه. تعالوا شوفوا براكم الوضع عند الساعة واحدة ظهراً وخروج تلاميذ المدرسة الشرقية من البوابة الشمالية.. لا حول ولا قوة إلا بالله.. ازدحام الطريق. أطفال (يتفسون دفس) داخل الرقشات والأمجاد.. ليه كدا بس قالوا لينا.. “أهلهم عايزين كدا” وليه كدا بس.

نقطة (5)
يا والي.. يا وزير.. يا مسئول.. لمن تكتب الصحافة وتقول هناك قضية انفجرت أو قد تنفجر، اعمل ساتر ووضع الارتكاز وخليك مفتّح عيونك زي عيون الكديس بالليل، ما تقول اهاااا دااا ما كلااام جرايد.. لأنو الضربة حتكون موجعة والرأي العام حيكون متابع.. ولا شنو يا جماعة

.(خمة نفس)

التحية لقوات مكافحة التهريب وجهاز الأمن والمخابرات الوطني بولاية الجزيرة.. بودمدني (5200) ألف رأس قندول بنقو وكلاشنكوف وذخيرة وكمان انتحل صفة نظامي.. بالله عليك.. أنت وقعت وقعة.. الشرطة صاحية والعيون مفتوحة.. حماية للوطن والمواطنين.. نبارك لكم الإنجاز الكبير.