نقطة… نقطة
(نقطة.. 1)
…جهاز المغتربين بالخارج تم إنشاؤه في عام 1998، وهو مسؤول عن تنظيم شؤون السودانيين العاملين بالخارج وتقديم الخدمات لهم. يهدف الجهاز إلى دعم المغتربين وتحسين ظروفهم المعيشية، بالإضافة إلى تعزيز التواصل بينهم وبين الوطن الأم.
طيب ما اختلفنا.. للكلام السمح دااا.. بس قول لي الجهاز دااا عمل شنو للمغتربين بالله عليكم!! .. يا جماعة حرام عليكم ما كفاية عليهم…. المغترب السوداني لو مخطط يشتغل سنة في الغربة يقعد سنوات وهو جاري عربات القطر… وكانوا شايلين الشيلة.. دعم الأسر وموية وكهربة الحلة والمستشفى والمركز الصحي، وخصوصاً لمن المليشيا المتمردة استباحت الخرطوم والجزيرة.. يا جماعة خففوا عليهم الله يخفف عليكم..
والله كان على أنا جيش موظفي جهاز المغتربين دااا أقول ليهم شكراً ليكم.. كفيتوااا ووفيتوااا، خلاص نشوف ليكم شغل تاني.. المغتربين تعبوا خلاص والله.
(نقطة.. 2)
…جهاز حماية الأراضي الحكومية في ولاية الجزيرة (وسط السودان) إدارة من إدارات وزارة التخطيط العمراني، كشر أنيابه معلناً بإزالة كل التعديات التي تقع على الأراضي الحكومية من دون مستند قانوني، الحاجة الكويسة دائماً ما يعلن الناس بأنو الإزالة جاياهم.. لموا عفشكم ساااااكت ونحنا ما نجامل زول مشيد بيت ولا عمارة في أرض حكومية من دون أوراق رسمية.. تاني ما في عشوائيات ولا شريط من حول المدن… نقول مبروك..
(نقطة.. 3)
..هيئة مياه ولاية الجزيرة في كل المدن والقرى، وبرضو هي إدارة من إدارات وزارة التخطيط العمراني… مجهوداتكم كبيرة ومعاكم إدارة البنية التحتية والكهرباء.. بعد تركيب الطاقة الشمسية في أكثر من (4500) بيارة كدااا تكونوا مزقتوا فاتورة استهلاك الكهرباء.. طيب عليكم بمتابعة سداد الفاتورة من الأحياء والقرى لتقديم الخدمة الممتازة… وكمان يكون حق الطاقة رجع.. وبعد دااااك التوريدة تكون من دون أي خسارة.. ولا مش كدااا يا هندسة.
(نقطة.. 4)
..شارع السكة حديد من تقاطع البحوث الزراعية… جنوب الشارع.. إيه دااا يا ناس.. كل يوم راكوبة جديدة.. وقطع غيار عربات (تشليح)… الحاصل شنو..
(نقطة.. 5)
..المعارف حاجة أحسن يسكت ساااااكت.
..قضاة المحكمة العامة بود مدني يعملون بصمت، ومن أمامهم أكثر من (80) قضية يومياً… يجلسون لساعات طويلة.. وهم ما بين سماع المتحري ومحامي الاتهام والدفاع.. تطبيقاً للقانون وميزان العدالة بعيداً عن العاطفة…
والما عارف ما يدور في تلك القاعات أحسن ما يقدح في نزاهة القضاء والقضاة.
