.. ما خلاص بلاش دسديس وأحسن الحاجة تكون فوق مطروحة طرح نلقى الجماعة عملو ليها توم شمار، إنتوا عايزين تودي البلد على وين بس..

@ مالك يا حاج سيد أحمد فاير فينا اليوم من الصبااااح

يا حاج حمد إنت ما شايف الضالع اليمين ديل.

@ أها في شنو كمان قول لينا يا أبو السياسة والأخبار.

أقول ليك إنت مكتب د كامل ما فيهو وجيع، كل مرة طالعين لينا بكلام وبعد شوية نفى، أسع دا وقت الناس تسمع بانو د. ليمياء خلاص سايبة البلد أقصد الوزارة، وقبلها قالوا الفريق كباشي كمان طالع من مركز القيادة ونازل معاش..

@ يا حاج سيد أحمد إنت كان باريت الدجاج بوديك الكوشة عديييل، وكما كان تابعت الكلام البتكتب حا تلقط الورق من الشارع..

@ أهااا كدي عدل لينا راسنا دا، فهمنا يا أبو العريف

حا أفهمك تب، بس قول لي فردتك حاجة نفيسة، سوى لينا قهوة مظبوطة بالجنزبيل عشان إنت تفهم بس.

حاضر يا ولد.. قول لي حبوبتك عملي لينا قهوة عشان نفهم من سيادتو المحلل الاستراتيجي دااا

@ ياخوي خت بطيخ صيفي في بطنك، ما في كلام بالشكل دا، ما في تغيير من الأصل، د. ليمياء زولة مجلس الوزراء قاعدة في محلها، وكمان الفريق كباشي ما ممكن يمشي ولا بتزحزح من محلو… وعلى بالطلاق لو مشى نقول خلاص انبشقت. دي إشاعات سااااكت بس، عايزين ليهم طريقة يرجعوا لكن ما في ليهم تاني يشموها قدحة.

غايتو أنا بقول لو مكتب بروف كامل بالصورة دي العساكر بنطو فيها تاني، ونقول عندهم حق وألف حق، لأنهم قالوا لينا هاكم أمسكوا البلد خلونا نحن نكاتل الجنجويد ديل ونقطع أصلهم محل ما بان، وأسع داا حكومتنا المدنية دي تميل شمال ومرة يمين ما عارفة تسوي شنو..

يا حاج سيد أحمد ما تصبروا شوية، طوالي عايزين تغيروا الجلابية وتلبسوا الكاكي..

@ غايتو الجيش ماشي حسب الخطة الاستراتيجية، اليوم في كردفان بكرة في دارفور والجبال، لمن يكمل المتمردين ديل ويلقاكم في حالكم داا بنط فيها وتبقى كاكي أخضر، وتاني ما عندكم كلام، وأحسن حكومة الأمل دي تضبط الإيقاع كويس، لو جابت نقرة مخالفة حرم تلقوا الجيش الما هين نط فيها تاني، أصلاً هو ما فاضي للبكورك في الداخل والخارج.

يعني بكلامك دا حكم عسكري..

@ إيوااا لو بالحالة دي حكم عسكري، وأنا متأكد الشعب حا يفضو للحكم، وداا الحايحصل وشايفو قدام عيوني كمان..

أحسن أشرب القهوة وأتخارج قبل ما تجيب لينا ضغط وسكري، ما أصلك إنت ما بتقول خير ولا عندك خبر سمح وزين.

@ كب الجنبة ساااااكت التقول جايب بنها ولا سكرااا.. ما إنت أصلك ما بتفهم.. اشرب وقوم على شغلتك..

خليتك بعافية يا حاج سيد أحمد، والله يكضب الشينة ويدمر الناس البنشروا الإشاعات دي.. مع السلاااامة.

………….

(خمة نفس)
ولاية الخرطوم أصدرت قراراً لكل المواطنين بحمل الأوراق الثبوتية،
طيب نحنا وين من دااا ياااا ولاية الجزيرة.. يجب مرادفة الإعلان مع الخرطوم ونزيد عليهو شوية، وذلك بالغرامة في حالة عدم إبراز هوية إثبات الشخصية.. لأنو الشفناهو أيام التمرد السوداء ما عايزنو يتكرر تاني خالص… ونطالب بشدة والي الجزيرة بإصدار قرار بذلك..