@ حاج سيداحمد، زول نصيحة، ما برضى الحقارة تب، زول دغري زي قضيب السكة حديد ما بتعوج، لانو لو اتعوج بقلب القطر فوق تحت، ما كان قايل الحكاية بتدور كدااا، ماسك خشمو ساااكت، وكلامو القالو لي حاج حمد “أبو العريف” ما وقع واطة، والليلة فرحان عايز يموت من الفرح عشان كلامو وقولو بقى حقيقة..
… أبو العريف جاهو عجاجتو تلوي.. سلاااام يا حاج سيداحمد.

وعليكم السلاااام… لكن أنا يا حاج حمد
أنا ما قلت ليكم..

@ قلت شنو؟ ورّينا قولك..

قولي.. خلوهو اسع دااا

@ حرام يا حاج سيداحمد ما نخلي قولك.. قول لينا، ما أصلو بقينا زي ناس الزهايمر نرجف وننسى. النزوح خلّى فينا حاجة..

قلت ليكم الإمارات دي بتقعد واطة، ويجي اليوم تسف فيهو التراب. هي ما عاملة نفسها ماسكة العالم بيدها، لكن إنت يا أبو العريف بتصدقني؟ ما أصلو راسك فاضي ساااكت.. ما تناقش حاجة.

@ طيب يا دكتور يا أبو السياسة ورّينا الإمارات سفت التراب كيفن..

طيب اسمعني كويس، ما تقاطعني.. ما أصلو هي لاعبة فردة مع إسرائيل، ومدّا كراعينا هنا وهناك، دخلت يدها عندنا هنا وقدّمت كل حاجة لمليشيا آل دقلو، لكن الجيش والشعب كانوا واعيين وراكيز، طردوا المليشيا من الخرطوم والجزيرة وسنار، ووسع شغل فتك متك وبل بس في جنوب كردفان، وداخلين على شمال دارفور. وعمك الكاهن كان في تركيا ومصر وقبلها في السعودية، يعني شرك أم زيردوا.. العالم كلو عرف وشاف الجرائم السواها ولد زايد والمتمردين في الخرطوم والجزيرة والفاشر وبابنوسة، لكن يا حاج حمد ولد زايد ما وقف لي هنا، مد لسانو لي السعودية كمان.

@ كيفن مد لسانو للسعودية يا حاج سيداحمد؟

ما أصلو ما عندهم فهم ولا خوّة.. قاموا رسلوا سلاح وعتاد لليمن من دون شورة وشلاقة ساااااكت.. الطيران السعودي رب.. رب، غطس حجر سفتين في ميناء المكلا، والقيامة قامت، وقالوا: ولد زايد ما نشوفك في اليمن، وعندك ساعات تطلع من هنا ولا تشوف منّا النجوم عز النهار.

@ وتاني حصل شنو يا حاج سيداحمد؟

الإمارات قالت خلاص أنا طالعة من هنا وطلعت، وقالت أنا انسحبت بإرادتي.. يعني يا حاج حمد دي هزيمة كبيرة ليها، واسع السعودية شغالة تصفية في وجود الإمارات في المنطقة، وخلاص بقت تحتضر ومحاصرة من كل الجهات، ودي الفرصة المناسبة يا حاج لتصفية وطرد الإمارات الإرهابية من السودان.

@ شنو يعني الكلام دا؟

الكلام دا يا أبو العريف، دويلة الإمارات تواجه هزيمة كبيرة، وعلى الدول العربية تستفيد من الحاصل داا وإبعادا من الشغالة فيهو داا. واسع يا أبو العريف بعد أخدت ضربة قوية من الطيران السعودي قالت الروب عديييل، وسحبت قواتا من اليمن.

@ ونحنا هنا في السودان يا حاج سيداحمد ما شغالة تمد في المتمردين من تشاد وليبيا وجنوب السودان بالسلاح والمرتزقة من كولومبيا؟

نحنا يا حاج “الجديد وصل” (وكشف بس)، ما عندنا ليهم حاجة كان هم ولا غيرن.. الإمارات في فتيل يا فردة.. فتك متك.. بل.. بس… نحنا البلوسي يا صاحبي..

شعب واحد.. جيش واحد.. مشتركة فوق.. دراعة للسمع والطاعة، تمبور قدّام.. تاني عايز حاجة يا حاج حمد؟ بالله أمشي كلّم حاجة نفيسة تسوي لينا قهوة نشربا بمزاج، ما أصلو فيلم بن زايد انتهى.. قلنا انتهى معناها انتهى… تاني مليشيا دقلو إلا تقول خلاص، كفاية ما هرّتونا، هرد كملتونا، وما فضلوا فينا نفاخ النار..

(خمة نفس)
أغلب الدول لديها شرطة خاصة للأسواق من أعلى رتبة لأصغر جندي، وزي خاص، ومحكمة خاصة، وقانون خاص، وكشف صحي و.. و.. الممنوع ممنوع.. نحنا عندنا الممنوع مرغوب… مطاردات ودقي يا مزيكا.. لمتين يا رجالا.. العود انكسر.